Poslovne vijesti - Makedonija

Турски компании ќе почнат бизнис во Македонија

Турција и Македонија немаат отворени прашања. Тие се две пријателски земји кои и во иднина ќе имаат исклучително добри стратешки политички и економски односи, оценува вицепремиерот и министер за финансии Зоран Ставрески, кој престојува во Турција каде учествува на пролетните средби на Европската банка за обнова и развој.

Смета дека има добри можности за зголемување на инвестициите од Турција.

- Тоа се две земји кои имаат добра соработка би рекол повеќе на политички, отколку на економски план и очекувам во иднина економската соработка да се продлабочува. Во секој случај на највисоко ниво, вклучително преку посети на премиерите на двете земји, претседателите и нивни средби, како и на сите други нивоа во изминатиот период, во многу наврати е искажана поддршката во напорите на едната или другата земја за остварување на надворешно политичките и на другите цели - изјави Ставрески.

Тој потенцира дека Македонија нуди многу поволности за инвеститорите од Турција во делот на даночната клима, ниски даноци, дополнителни даночни поволности за инвестирање во слободните економски зони, квалификувана работна сила, можност за работа и соработка во делот на различни сектори.

- Очекувам голем дел од турските инвеститори што се запознати со поволностите за инвестирање во Македонија, преку економските презентации што ги прави Владата, да дојдат и да почнат бизнис во Македонија - истакна Ставрески.

Потребата од подобрувањето на бизнис-климата во земјите во транзиција, како што рече министерот Ставрески, била посочена и на Собранието на ЕБОР. Тој потенцира дека Македонија веќе го подобри рангирањето на листата на "Дуинг бизнис" од 94. место во 2006 година на 23. место, ги задржа ниските даноци и слично.

Годишното собрание на ЕБОР во Истанбул оваа година е посветено на растот, односно како да се поттикне економскиот раст. Посочи дека политиките што ги предлага ЕБОР за подобрување на бизнис-климата Македонија ги спроведува со години.